帶隊遊香港Day 5 & 6

11月20

呢日陽光普照,歐洲人嘅夏天.我哋正式做觀光客.首先黎到淺水灣.歐洲人本色見有太陽就hea喺度.Hea咗成大半個鐘.

破壞大自然嘅美化語.

呢度仲係咪叫淺水灣酒店呀?第一次黎,感覺幾好.

記得睇過報導話呢度有博物館.周圍搵.原來只有幾個窗.

跟住去赤柱食lunch. 咁遠黎香港當然唔食德國菜啦,最後入咗間越南菜.食飽飽就去買手信.

夜晚朋友們話約咗一個我都識嘅人,心諗有乜水住香港我都識.原來係喺佢哋地頭見過嘅瑞士人,佢咁啱郵輪假期停香港.一大班人於是去半島嘅Felix bar飲嘢.啲嘢預咗貴,一杯冇酒精飲品都要八十幾蚊架.但係因為佢個男廁係景點,都要帶朋友黎見識吓.未黎過嘅等我解釋吓先.佢啲尿兜喺落地大玻璃前,解決嘅時候可以高居臨下欣賞尖咀景色.今次個景我覺得靚咗.可能尖咀依家多咗高樓. 男blog友黎到唔急都記住去疴一督呀.

飲完嘢就去『紅星』食飯.講起佢就一肚氣.

因為就唔到每人口味,我哋係中菜西食(自己食自己),我叫咗炒帶子同黃油焗蟹蓋.大家同一時間落單,有啲食完有啲人嘅嘢都仲未黎.我個帶子上枱,帶子居然係薄切,從未見過.而黃油焗蟹蓋大家食完都仲未黎,催呀催等呀等,一個鐘後先黎話冇晒.佢講大話都唔斬眼.成間酒樓個個都食黃油蟹,點會冇黃油焗蟹蓋,分明係唔想整!

-----------------------------------------------------------------

11月21

因為我要去銅鑼灣買Simpsons漫畫,咁諗住呢日活動係銅鑼灣shopping.呢日係禮拜六,條街超多人,嚇親我啲朋友.個個都話唔想行.想搵間cafe hea又冇位.咁好啦,去灣仔.

經過『屁灑客』見有tea set就入去幫襯.侍應上咖啡瀉晒出黎.朋友A批評話乜咁架.搞到我之後唔敢帶佢哋去(仲差嘅)茶餐廳.

受到旅發局單張影響,佢哋居然想去同胞景點. 我好日都唔會黎,以為會展入面可以行到去.所以去咗設計廊先,show吓香港啲design俾佢哋睇.我鍾意呢個相架,但係好貴架!

問人先識點行去呢個景點,呢度夜晚仍然好多人.

人有三急,common sense 黎到藝術中心.我覺得真係好藝術.